فراق ما بعدة فراق

مريت بعيني على الكُتُب ..
من فوق لتحت


سابني قلبي و طار بعيد ..
لما لَمَحت


صورة حبيبي ع الكتاب ..
و بشوق سَرَحت


نزلت دموعي ما اعرف ..
بكيت و لا فرحت

خدت الكتاب ..
بوسته و ضميته و فَتَحت


فَرّت صوابعي في الورق ..
قمت انجرحت


دمي سال من قصيدة..
لما في بحورك سَبَحت


و لقيتني فكرة ..
لسه عايشة جوه منك بس توهت


ليه يا هوى قلبي اللي تاب ..
بالسر بُحْت؟


كتبت أسمي و جنب منه ..
قولت نادم إني رُحْت


نسيت قراراك و اختيارك ..
و الخطايا اللي استبَحت؟


نسيت قساوتك ..
لما بفراقنا سَمَحت؟


غلطتي إني هويتك ..
و غلطتك إنك جَرَحت


ظلمتني ..
و بردوه زيك اتعاقبت


لا أنت نسيت و لا أنا ..
بالبُعد عنّك إسترَحْت!
·